Sign the Manifesto
Sign the Manifesto >

ᐅᓇ ᓂᕈᐊᖅᑕᐅᔪᒪᔪᓄᑦ ᐱᕚᓪᓕᕈᑎᓴᖅ

ᐅᓇ ᑐᓴᕐᑎᑦᑎᔪᖅ ᑲᓇᑕᒥ ᐱᓯᒪᔪᑦ ᐸᕿᑦᑎᐊᖁᓪᓗᒍ ᓄᓇᕐᔪᐊᖅ ᐊᒻᒪᓗ ᐊᓯᖏᑦ

ᐱᒋᐊᕐᓂᐊᖅᑐᑦ ᐅᓇ ᑕᐃᒪᓐᓇᐅᔪᒪᔭᖓᑦ ᐅᓇ ᑲᓇᑕ ᓵᓯᒪᓕᖅᑕᖓ ᐊᖕᖏᓂᖅᐹᖅ ᐊᒃᓱᕈᓐᓇᖅᑑᓕᖅᑐᑦ ᒫᓐᓇᐅᔪᖅ ᐃᖃᐅᒪᔭᑦᑎᓂ.      

ᐅᑯᐊ ᑭᓕᓯᓂᐊᕐᑏᑦ ᐅᖃᖅᓯᒪᔪᑦ ᓱᓕᔪᒥᒃ ᑲᒪᓇᕐᓂᖅᐹᖑᔪᓂᒃ ᓇᓗᓇᐃᔭᑦᑎᐊᖅᓯᒪᔪᑦ ᐱᑦᑎᐊᖅᑕᐅᖃᑦᑕᓚᐅᓐᖏᓂᖏ ᑲᓇᑕᐅᑉ ᑕᒪᓐᓇ ᑭᖑᓂᕆᕚ. ᐃᓗᖅᑐᖅᓯᕙᓪᓕᐊᔪᖅ ᑳᖃᑦᑕᕐᓂᖅ ᐊᔪᖅᓴᕐᓂᖅ ᐊᒻᒪᓗ ᐊᔾᔨᒌᒃᑎᑕᐅᓐᖏᓐᓂᖅ ᕿᓕᕈᕆᕚ ᑲᓇᑕᐅᑉ ᓯᕗᓂᕆᓂᐊᖅᑕᖓᓂ. ᐊᒻᒪᓗ ᑲᓇᑕᐅᑉ ᐱᕚᓪᓕᕐᓂᖅᐹᕆᓯᒪᔭᖓ ᓯᓚᐅᑉ ᐅᖂᓂᖓᑕ ᐊᓯᑦᔨᕐᓂᖓ ᐅᑯᐊ ᐱᓂᕐᓘᑕᐅᓯᒪᓂᖅᐸᐅᕗᑦ ᐃᓅᓯᓕᒫᒥ ᓯᕗᓂᑦᑎᓐᓃᓐᓂᐊᖅᑐᑦ.

ᐅᑯᐊ ᓱᓕᔪᑦ ᐋᓐᓂᐊᑎᑦᑎᓂᖅᓴᐅᔪᑦ ᐱᔾᔪᑎᒋᓪᓗᒋᑦ ᕿᒪᒍᑎᓯᒪᑦᑎᐊᕐᒪᑕ ᐊᖏᔪᒥᒃ ᐅᖃᖅᓯᒪᔭᑦᑎᓄᑦ: ᐃᒃᐱᒍᓱᑦᑎᐊᕐᓂᖅ ᓄᓇᖅᑲᖅᑳᖅᓯᒪᔪᑦ ᐱᔪᓐᓇᕐᓂᖏᓐᓂᒃ, ᓄᓇᖃᖅᑳᖅᓯᒪᔪᓕᕆᓂᖅ, ᐃᓅᓯᕐᒥ ᐱᔪᓐᓇᐅᑎᑦ, ᐊᔾᔨᒌᓐᖏᑑᑕᐅᓂᖅ, ᐊᒻᒪᓗ ᐊᕙᑎᑦᑎᓂᒃ ᐱᔨᑦᑎᕋᑦᑎᐊᕐᓂᖅ.   

ᐃᓅᓯᖃᓐᖏᓐᓇᑕ ᒪᓕᒡᓗᒋᑦ ᐅᑯᐊ ᐃᓅᓯᑦᑎᓂ ᐊᑕᔪᑦ ᐅᑉᓗᒥ — ᑭᓯᐊᓂ ᑕᐃᒪᓐᓇᐅᔪᓐᓇᖅᑐᒍᑦ.

ᐃᓅᓯᖃᕈᓐᓇᖅᑐᒍᑦ ᑲᓇᑕ ᐊᐅᓚᑕᐅᖅᑎᐊᖅᑐᒥᒃ ᑕᒫᐅᓇ ᓄᓇᒥ ᓱᕋᐃᓐᖏᑦᑐᓂᒃ ᐆᒻᒪᖁᑎᖃᕐᓗᑕ, ᐃᓚᐅᖅᓯᒪᓗᒍᓗ ᐊᑐᖅᑕᐅᔪᓐᓇᖅᑐᓂᑦ ᐃᓄᓕᒫᓂᑦ ᐃᖏᕐᕋᔾᔪᑏᑦ ᐃᑭᒪᕕᒃᓴᐃᑦ, ᑖᑉᑯᐊᓗ ᐃᖅᑲᓇᐃᔮᒃᓴᐃᑦ ᐊᒻᒪᓗ ᐱᕕᖃᕐᑎᑕᐅᓂᖅ ᑕᒪᑐᒨᓇ ᓅᐸᓪᓕᐊᓗᑕ ᐊᓯᕈᖅᐸᓪᓕᐊᔪᓄᑦ  ᓴᓇᔭᐅᕙᓪᓕᐊᑎᐊᑲᐅᑎᒋᔪᑦ ᐱᑕᖃᕐᓂᐊᖏᒻᒪᑦ ᐃᓅᖃᑎᒥᖕᓂᒃ ᑭᓇᐅᓂᖏᓐᓂᒃ ᐊᑭᕋᖅᑐᕐᓂᖅ ᐊᒻᒪᓗ ᐊᕐᓇᐃᑦ ᐊᖑᑎᓪᓗ ᐊᔾᔨᒌᒃᑎᑕᐅᓐᖏᓂᖏᓐᓄᑦ. ᐸᕿᑦᑎᐊᕐᓂᖅ ᐊᓯᒥᒃ ᐃᒻᒥᖕᓂᒃ ᐊᒻᒪᓗ ᐸᕿᑦᑎᐊᕐᓂᖅ ᓄᓇᕐᔪᐊᑦᑎᓂᒃ ᐅᓇ ᑮᓇᐅᔭᑎᒍᑦ ᐱᕙᓪᓕᐊᑎᐊᕈᑕᐅᔪᓐᓇᖅᑐᖅ ᓱᑲᓕᔪᒥᒡᓗ ᐱᕈᖅᐸᓪᓕᐊᑎᑕᐅᓗᑎᒃ ᑎᒥᐅᔪᑦ. ᐊᒥᓱᑦ ᐅᓄᖅᑐᑦ ᐃᓄᐃᑦ ᐊᑭᑐᓂᓴᐅᔪᓂᒃ ᐃᖅᑲᓇᐃᔮᖃᕈᓐᓴᕐᓂᐊᕐᒪᑕ ᐊᒻᒪᓗ ᐃᑲᕐᕋᖏᑦ ᐅᓄᓐᖏᓂᖅᓴᐅᓗᑎᒃ. ᕿᒪᒡᓗᒍ ᐊᑯᓂᐅᔪᓂᒃ ᐃᓂᖃᕐᑎᑕᐅᓗᑕ ᖁᕕᐊᒋᓂᐊᕋᑦᑎᒍᑦ ᓇᒡᓕᒋᔭᕗᑦ ᐊᒻᒪᓗ ᐱᕈᖅᑎᐊᕐᓗᑎᒃ ᓄᓇᓖᑦ.        

ᖃᐅᔨᒪᔪᒍᑦ ᒫᓐᓇᐅᓕᖅᑐᖅ ᐊᖏᔪᒃ ᐊᓯᕈᖅᐸᓪᓕᐊᓂᕗᑦ ᕿᓚᒥᑯᓘᓕᕐᒪᑦ. ᓯᓚᐅᑉ ᐅᖂᓂᖓ ᐊᓯᑦᔨᕐᓂᖓᓄᑦ ᖃᐅᔨᓴᖅᑎᒻᒪᕇᑦ ᐅᖃᐅᔾᔨᓯᒪᔪᑦ ᐅᕙᑦᑎᓂᒃ ᑕᒪᑐᒪᓂ ᐊᕐᕌᒍᓂ ᖁᓕᓂᑦ ᐃᓱᒪᓕᐅᕆᔭᕆᐊᖃᕐᓂᐊᖅᑐᒍᑦ ᐊᑐᖅᑕᐅᓂᐊᖅᑐᓂᒃ ᓱᕋᒃᑕᐅᓚᐅᓐᖏᓂᖓᓂ ᓄᓇᕐᔪᐊᖅ ᐅᓗᕆᐊᓇᖅᑐᒦᓂᖓᓂᒃ. ᐅᓇ ᑐᑭᖃᖅᑐᖅ ᒥᑭᔪᓂᒃ ᐱᕙᓪᓕᐊᕋᔮᕆᐊᖃᔾᔮᔪᓐᓇᓃᕋᑉᑕ ᓇᒧᖓᐅᔭᕆᐊᖃᖅᑕᑦᑎᓄᑦ.

ᑕᐃᒪᓗ ᐱᕕᖃᕐᑎᑕᐅᓂᕗᑦ ᐊᑐᕆᐊᖃᓕᖅᑕᕗᑦ.

ᐅᓇ ᐱᕕᖃᕐᑎᑕᐅᓂᑦᑎᓂᒃ ᐱᔭᕆᐊᖃᕐᓂᕆᔭᕗᑦ  ᐱᒋᐊᕐᓗᑕ ᐃᒃᐱᒋᑦᑎᐊᕐᓗᒍ ᐱᔪᓐᓇᕐᓂᖃᕐᑎᑕᐅᓂᕗᑦ ᐊᒻᒪᓗ ᐱᖃᕐᓂᕗᑦ ᐱᔪᓐᓇᕐᓂᕗᑦ ᐸᕿᔨᐅᓪᓗᑕ ᑕᒪᑐᒥᖓ ᓄᓇᑦᑎᓂᒃ. ᓄᓇᖅᑲᖅᑳᖅᓯᒪᔪᑦ ᓄᓇᖏᑦ  ᓯᕗᓕᐅᖃᑦᑕᖅᓯᒪᔪᑦ ᓴᐳᒻᒥᓪᓗᒋᑦ ᑰᑦ, ᓯᒡᔭᐃᑦ, ᓇᐹᖅᑐᓖᑦ ᐊᒻᒪᓗ ᓄᓇᐃᑦ ᑲᒻᐸᓂᐅᔪᓂᑦ ᓱᕋᑦᑎᔭᐅᓕᖁᓇᒋᑦ ᖃᓄᐃᓕᐅᖅᑕᐅᔪᓄᑦ. ᐅᓇ ᐃᑲᔫᑎᔪᑦ ᑕᒪᐅᓐᓇ ᐃᓂᒥᒃᑎᒍᑦ, ᐋᕿᑦᑎᐊᕐᓗᒍᓗ ᐃᓚᒌᒍᓯᖅᐳᑦ, ᑕᒪᐅᓐᓇ ᐊᑐᓕᖅᑎᑕᐅᓗᑎᒃ ᔪᓇᐃᑎᑦ ᓇᐃᓴᒃᑯᑦ ᐊᖕᖏᕈᑎᖏᑦᑎᒍᑦ ᐱᔪᓐᓇᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ. 

ᓅᑕᐅᓪᓗᑎᒃ ᐊᖕᖏᕈᑎᑦᑎᒍᑦ ᐅᑯᐊ; ᐋᕿᒃᓯᓯᒪᔾᔪᑕᐅᔪᑦ ᒪᓕᒐᕐᓂᒃ ᒪᓕᒡᖢᑎᒃ ᑲᓇᑕᒥᒃ ᐊᒻᒪᓗ ᑲᑎᑦᑎᓯᒪᔪᖅ ᐅᕙᑦᑎᓂᒃ ᐊᑐᖃᑎᒌᖕᓂᐊᕋᑉᑕ ᓄᓇᒥᒃ “ᑕᐃᒪᖓᓕᒫᖅ ᓯᕿᓂᖅ ᓴᕿᖃᑦᑕᕐᓂᐊᕐᑎᓪᓗᒍ, ᐅᑯᐊᓗ ᐱᕈᖅᑐᑦ ᐱᕈᕐᓗᑎᒃ ᐊᒻᒪᓗ ᑰᑦ ᑰᒡᓗᑎᒃ,” ᑕᐃᒪᓗ ᐆᒪᖁᑎᖃᕈᒪᕗᒍᑦ ᐊᑯᓂᐅᓂᐊᖅᑐᒥᒃ ᑕᐃᒪᓗ  ᐊᑯᓂᒻᒪᕆᐋᓗᒃ ᐃᒻᒪᕐᓂᓴᐅᓕᕋᓗᐊᕈᓂ ᐊᒻᒪᓗ ᓄᖑᓚᐅᖅᓯᒪᓐᖏᓪᓗᓂ ᐊᒻᒪᓗ ᑐᖁᓇᖅᑐᓕᖅᓱᖅᑕᐅᓐᖏᓪᓗᓂ ᓄᓇ. ᓄᑖᑦ ᐱᓕᕆᔾᔪᑕᐅᓕᖅᑐᑦ ᖃᕆᓴᐅᔭᐃᓪᓗ ᐊᑐᖅᑕᐅᓕᖅᑐᑦ ᐅᓇ ᐊᑐᕈᒪᔭᑦᑎᓐᓂᒃ ᐊᑐᕐᑎᑦᑎᓂᐊᕐᒪᑕ ᑎᑭᑕᒃᓴᐅᓕᕐᓗᑎᒃ. ᑭᖑᓪᓕᖅᐹᖅ ᖃᐅᔨᓴᖅᑕᐅᓯᒪᔪᖅ ᑕᑯᑎᑦᑎᓯᒪᔪᖅ ᐃᓗᐊᓂ ᐊᕐᕌᒍᑦ ᒪᕐᕉᒃ 100 ; ᑎᑭᐅᑎᓚᐅᓐᖏᓂᖓᓂ 2050 ᑕᐃᒪᓗ ᐱᕋᖅᑐᒍᑦ 100% ᑮᓇᐅᔭᑎᒍᑦ ᐱᕙᓪᓕᐊᑎᑦᑎᓂᐊᕐᓂᕐᒧᑦ ᐱᐅᔪᓂᒃ.  ᐱᒋᐊᖅᑕᐅᖁᓕᖅᑕᕗᑦ ᐅᓇ ᐊᓯᑦᔩᓂᖓ ᐱᒋᐊᕐᓗᓂ ᒫᓐᓇ.

ᑕᐃᒪᓗ ᐱᑕᖃᕈᓐᓃᖅᑐᖅ ᐱᓕᕆᔪᒪᓐᖏᔾᔪᑕᐅᓇᔭᖅᑐᓂᒃ ᓴᓇᓂᕐᒧᑦ ᓇᐸᕆᐊᓕᖕᓂᒃ ᐱᓕᕆᐊᖑᔪᓂᒃ ᑕᒪᓐᓇ ᒪᑐᐃᖅᓯᔪᓐᓇᖅᓯᒪᓐᖏᑦᑐᖅ ᐅᕙᑦᑎᓄᑦ ᐲᔭᐃᕙᓪᓕᐊᔪᓄᑦ ᐊᒥᓱᓄᑦ ᐊᕐᕌᒍᓂ ᑎᑭᓪᖢᒍ ᓯᕗᓂᒃᓴᑦᑎᓄᑦ. ᐅᓇ ᓄᑖᖅ ᑎᓯᓂᖅᐹᖅ ᒪᓕᒐᖅ ᐆᒻᒪᖁᑎᓂᒃ ᐱᕙᓪᓕᐊᑎᑦᑎᓂᖅ ᐃᒪᓐᓇᐅᔭᕆᐊᓕᒃ: ᐃᒡᓗᑦᓯᓂ ᓴᓂᐊᓂ ᐱᓯᒪᒐᔭᓐᖏᒃᑯᖕᓂ, ᑕᐃᒪᓗ ᐃᓂᖃᓐᖏᓚᖅ ᑭᓇᑐᐃᓐᓇᐅᑉ ᐃᒡᓗᐊᑕ ᓯᓚᑖᓂ.  ᐅᓇ ᐊᑑᑎᔪᖅ ᐊᔾᔨᒋᑦᑎᐊᖅᑕᖓ ᐅᖅᓱᐊᓗᖕᒧᑦ ᐊᒻᒪᓗ ᒑᓯᑦ ᓱᓪᓗᐊᓗᖏᓐᓄᑦ;  ᐅᖅᓱᐊᓗᓕᕆᔪᑦ ᓅ ᐳᓚᓐᔅᕕᒃ, ᑯᐸᐃᒃ ᐊᒻᒪᓗ ᐳᑎᓯ ᑲᓚᑉᐱᐊ; ᐅᓄᖅᓯᔪᑦ ᐅᖅᓱᐊᓗᖕᓂ ᐅᓯᑲᖅᑕᖅᑐᑦ ᐃᒪᕖᑦ ᓯᒡᔭᖏᑦᑎᒍᑦ; ᐊᒻᒪᓗ ᑲᓇᑕᐅᑉ ᓇᖕᒥᓂᕆᔭᖏᑦ ᐅᔭᕋᖕᓂᐊᖅᑐᑦ ᓄᓇᕐᔪᐊᒥ ᓇᓂᑐᐃᓐᓇᖅ.

ᓈᒻᒪᒃᓯᓯᒪᓂᖓ ᐆᒪᖁᑎᓕᕆᓂᕐᒥ ᓂᕈᐊᕈᓐᓇᕐᓂᖅ ᑎᑭᐅᑎᕗᖅ: ᐅᒃᐱᕈᓱᒃᑐᑦ ᐊᓯᔩᑐᐃᓐᓇᕐᓂᐊᓐᖏᑦᑐᒍᑦ ᐆᒪᖁᑎᒃᓴᖃᕐᕕᖕᓂᒃ, ᑭᓯᐊᓂᓕ ᓇᐅᒃᑯᑐᐃᓐᓇᖅ ᓄᓇᓖᑦ ᐊᐅᓚᑦᑎᓗᑎᒃ ᑕᒪᒃᑯᓂᖓ ᓄᑖᓂᒃ ᐆᒻᒪᖁᑎᓕᕆᔾᔪᑕᐅᔪᓂᒃ. ᐊᓯᐊᒎᕈᓯᒃᓴᓄᑦ ᑮᓇᐅᔭᖅᕌᓱᒃᑐᑦ ᓇᖕᒥᓂᖃᖅᑐᑦ ᑲᒻᐸᓂᐅᔪᑦ ᐊᒻᒪᓗ ᐃᓄᑭᑦᑐᓃᑦᑐᑦ ᓂᕈᐊᖅᑕᐅᓯᒪᔪᑦ ᐃᓚᖏᓐᓂᑦ ᐃᓄᒋᐊᖕᓂᖅᓴᐅᔪᓂᑦ ᐃᓂᓕᐅᖅᓯᒪᔪᓂᑦ, ᓴᕿᑦᑎᖃᑦᑕᖅᑐᒍᑦ ᓄᑖᓂᒃ ᐱᓕᕆᔾᔪᑕᐅᓕᖅᑐᓂᒃ ᐱᒋᓕᖅᖢᒋᑦ ᓴᓇᓯᒪᔪᑦ: ᓂᕈᐊᖅᑕᐅᓯᒪᔪᓂᑦ ᐊᐅᓚᑕᐅᔪᑦ, ᐊᑭᓕᖅᓱᐃᖏᓐᓇᖅᑐᑦ ᐃᓅᔾᔪᑎᒋᓂᐊᖅᑕᒥᖕᓄᑦ ᐊᒻᒪᓗ ᑮᓇᐅᔭᐃᑦ ᐃᓯᕆᐊᓖᑦ ᐱᑕᖃᕆᐊᓕᑦ ᓄᓇᓕᖕᓂ. ᐊᒻᒪᓗ ᓄᓇᖅᑲᖅᑳᖅᓯᒪᔪᑦ ᓯᕗᓪᓕᖅᐸᐅᔭᕆᐊᓕᑦ ᐱᑎᑕᐅᓗᑎᒃ ᐃᓄᓕᒫᓂᑦ ᐃᑲᔪᖅᓱᖅᑕᐅᓗᑎᒃ ᓇᖕᒥᓂᖅ ᓴᓗᒪᑦᑎᐊᖅᑐᓂᒃ ᐆᒪᖁᑎᖃᓂᐊᕐᒪᑕ. ᑕᐃᒪᓗ ᑕᐃᒪᓐᓇᐅᓇᔭᕈᓂ ᓄᓇᓖᑦ ᒫᓐᓇᐅᔪᖅ ᐱᓕᕆᔪᑦ ᐅᖁᒪᐃᑦᑐᓂᒃ ᐋᕿᓐᓂᐊᖅᑕᐃᓕᑎᑦᑎᓂᕐᒧᑦ ᐊᒃᑐᐃᔪᑦ ᓱᕈᖅᓴᖅᑕᖏᓐᓂᑦ ᑲᒻᐸᓂᐅᔪᑦ ᖃᓄᐃᓕᐅᖅᑕᐅᔪᓂᑦ.

ᖃᐅᔨᒻᒪᖁᑎᖃᕐᑎᑦᑎᓂᖅ ᑕᐃᒪᓐᓇ ᖃᐅᒪᑎᑦᑎᓗᐊᕋᔭᓐᖏᒪᑦ ᐃᒡᓗᑦᑎᓂᒃ ᑭᓯᐊᓂᓕ ᑮᓇᐅᔭᓕᐅᕈᑕᐅᓂᖅᐸᐅᒐᔭᖅᑐᖅ, ᐃᓗᑐᑲᓐᓂᕐᓗᓂᓗ ᓂᕈᐊᖅᑕᐅᓯᒪᔪᓕᕆᓂᖅ, ᓴᖕᖏᑎᓴᕐᓗᒍᓗ ᑮᓇᐅᔭᑎᒍᑦ ᐱᕙᓪᓕᐊᑎᑦᑎᓂᖅ ᐊᒻᒪᓗ ᒪᒥᐸᓕᐊᓕᕐᓗᑎᒃ ᐊᖕᒪᖅᑎᖅᑕᐅᓯᒪᔪᑦ ᐃᒻᒪᑲᓪᓚᖕᓂᑦ ᑕᐃᒪᖓ ᓄᓇᓕᖓ ᐱᒋᐊᓚᐅᕐᒪᑦ.

 

ᐱᕚᓪᓕᖅᑐᑦ ᓱᕈᖅᓴᐃᓐᖏᑦᑐᓂᒃ ᑮᓇᐅᔭᑎᒍᑦ ᐱᕙᓪᓕᐊᑎᑦᑎᔾᔪᑎᒃᓴᓂᒃ ᓴᕿᑦᑎᓗᑎᒃ ᐊᒥᓱᒻᒪᕆᐋᓗᖕᓂᒃ ᒪᑐᐃᖓᔪᖃᓕᕋᔭᖅᑐᖅ ᐊᔾᔨᑎᐊᐸᓗᖏᓐᓂᒃ ᐊᒥᓱᓂᒃ “ᓵᓚᖃᖅᑐᑦ.” ᐱᔪᒪᕗᒍᑦ ᐱᓕᕆᑎᑦᑎᔾᔪᑎᒋᔭᕗᑦ ᐋᕿᒃᓱᐃᓗᓂ ᐆᒪᖁᑎᓂᒃ ᐊᑐᓗᐊᖅᓯᓐᓇᓐᖏᑦᑐᓂᒃ ᐊᖕᖏᕋᖏᓐᓂ, ᐊᒻᒪᓗ ᐋᕿᑦᑎᐊᕐᓗᒋᑦ ᐊᑑᓕᖃᓕᑦᑎᐊᕐᓗᒋᑦ ᒫᓐᓇᐅᔪᖅ ᐃᒡᓗᒋᔭᐅᔪᑦ ᐃᓄᖕᓂᑦ, ᐃᑲᔫᑎᑦᑎᐊᕐᓗᑎᒡᓗ ᑮᓇᐅᔭᓕᐅᓗᐊᓐᖏᑦᑐᓄᑦ ᓄᓇᓕᖕᓄᑦ ᐊᒻᒪᓗ ᓴᓂᓕᖏᑦ ᐃᑲᔫᑎᖃᖅᖢᑎᒃ ᐊᒻᒪᓗ ᐃᖅᑲᓇᐃᔮᒃᓴᖏᓐᓄᑦ ᐱᔭᕆᐅᖅᓴᑎᑕᐅᓗᑎᒃ ᐱᕕᖃᕐᑎᑕᐅᓗᑎᒃ ᐊᑦᑎᒃᓯᓯᒪᓂᐊᕐᒪᑦ ᑳᖃᑦᑕᕐᓂᖅ ᐊᒻᒪᓗ ᐊᔪᖅᓴᖃᑦᑕᕐᓂᖅ ᐊᑯᓂᐅᔪᒃᑯᑦ. ᐱᔪᒪᕗᒍᑦ ᐱᔭᕆᐅᖅᓴᑎᑦᑎᔾᔪᑎᒃᓴᓂᒃ ᐊᒻᒪᓗ ᐊᓯᖏᓐᓂᒃ ᐃᑲᔫᑎᒃᓴᓂᒃ ᓴᓇᔨᑦᑎᓄᑦ ᐸᐅᖃᓗᐊᖅᑐᓂ ᓴᓈᒃᓴᓄᑦ, ᐃᓚᐅᑦᑎᐊᕈᓐᓇᕐᓗᑎᒡᓗ ᓴᓗᒪᑦᑎᐊᖅᑐᓂ ᐆᒪᖁᑎᓄᑦ ᑮᓇᐅᔭᓕᐅᕈᑎᒋᓗᒋᑦ.  ᐃᖅᑲᓇᐃᔭᕐᑎᑦ ᒪᓕᒐᖃᕐᓗᑎᒃ ᐊᑦᑎᒃᓯᓯᒪᓂᐊᕐᒪᑕ ᓯᓚᑐᐃᓐᓇᒧᑦ ᐸᐅᖅ ᐊᓂᐊᑎᑕᑎᒃ ᓴᓇᕕᒋᔭᖏᓐᓂᑦ, ᐃᓚᒌᒃᓴᑯᑎᒍᑦ ᐃᖅᑲᓇᐃᔭᕐᑏᑦ ᑐᓂᓯᓯᒪᓗᑎᒃ ᑐᑭᒧᐊᒍᑕᐅᓂᐊᖅᑐᓂᒃ. ᓱᑲᔪᒻᒪᕆᐋᓗᐃᑦ ᓄᓇᓯᐅᑎᑯᑖᑦ ᑕᒪᐅᓐᓇᑐᐃᓐᓇᖅ ᓄᓇᑦᑎᓂᒃ ᓱᕈᖅᓴᐃᓐᖏᑦᑐᑦ ᐊᒻᒪᓗ ᐊᑭᑐᒋᔭᐅᓐᖏᑦᑐᑦ ᐃᓄᓕᒫᓄᑦ ᐃᖏᕐᕋᔾᔪᑎᒃᓴᐃᑦ ᑲᑎᖓᑎᐊᕐᑎᑦᑎᓂᐊᖅᑐᑦ ᑕᒪᐃᓐᓂᒃ ᓄᓇᓕᖕᓂᒃ ᓄᓇᑦᑎᓂ   ᐃᓇᒌᓂᐊᕐᒪᑕ ᓄᓇᓯᐅᓂᒃ, ᓱᓪᓗᐊᓗᖕᓂᒃ ᐊᒻᒪᓗ ᖄᖃᑦᑕᖅᑐᑦ ᐅᑯᐊᓗ ᐅᓗᕆᐊᓇᖅᑐᑰᕐᑎᑦᑎᔪᑦ ᐅᕙᑦᑎᓂᒡᓗ ᐊᕕᒃᓯᓯᒪᔪᑦ.

ᐊᒻᒪᓗ ᑕᐃᒪᖓᓂ ᖃᐅᔨᒪᕗᒍ ᐅᓇ ᐱᒋᐊᕐᓂᕗᑦ ᐱᒋᐊᖅᑐᖅ ᑭᖑᕙᖅᓯᒪᓪᓗᓂ, ᑕᐃᒪᓗ ᖃᑭᒐᓱᐊᕈᑎᖃᕐᓗᑕ ᓄᖑᐸᓪᓕᐊᔪᓂᒃ ᐃᓄᓕᒫᓄᑦ ᓇᐸᖅᑕᐅᓯᒪᔪᓂᒃ ᑕᐃᒪᓗ ᓇᐸᑦᑎᐊᓐᓇᕐᓂᐊᖅᑐᑦ ᐊᑯᓚᐃᑦᑐᒥᒃ ᓯᓚᓗᖃᑦᑕᕐᑎᓪᓗᒍ.

ᓅᐸᓪᓕᐊᓗᑕ ᓄᓇᓕᖕᓃᓂᖅᓴᐅᓂᐊᖅᑐᓂᒃ ᐊᒻᒪᓗ ᐆᒪᔪᓕᒫᓂᑦ ᐊᕙᑎᖏᓐᓂᒡᓗ ᓂᕿᓴᖃᕐᑎᑦᑎᕕᒃᓴᓂᒃ  ᐊᑦᑎᒃᓯᓯᒪᒐᔭᖅᑐᖅ ᐅᖅᓱᐊᓗᖕᒧᑦ, ᐱᔭᐅᓗᓂ ᐸᐅᖅ ᐃᔾᔪᕐᓂᑦ, ᐊᒻᒪᓗ ᐃᓴᒃᑎᑦᑎᐊᕐᓗᒍ ᑲᑉᐱᐊᓇᖅᓯᖃᑦᑕᖅᑐᑦ ᓄᓇᕐᔪᐊᒧᑦ ᐱᒃᓴᖏᑦ – ᐊᒻᒪᓗ ᓴᕿᑦᑎᓗᑕ ᑎᒥᒧᑦ ᐱᐅᓇᕐᓂᖅᓴᐅᔪᓂᒃ ᐊᒻᒪᓗ ᐊᑭᑭᒋᔭᐅᓐᖏᑦᑐᓂᒃ ᓂᕿᓂᒃ ᑕᒪᐃᓐᓄᑦ ᐃᓄᓕᒫᓄᑦ.

ᐱᔪᒪᕗᒍᑦ ᐃᓱᓕᑎᑕᐅᓗᑎᒃ ᑲᒻᐸᓂᕐᔪᐊᖑᔪᑦ ᑕᐅᖅᓰᖃᑦᑕᕐᓂᖓᓂ ᐊᑭᒃᑭᓕᒋᐊᕐᑎᑦᑎᖃᑦᑕᕐᓂᖅ ᑕᐃᒪᓗ ᑐᓂᓯᓯᒪᓂᐊᖅᑐᖅ ᑯᐊᐳᕇᓴᒃᑯᓂᒃ ᓴᖕᖏᓂᑖᕐᑎᑦᑎᓯᒪᓗᑎᒃ ᐸᒡᕕᓴᐅᑎᒃᓴᓂᒃ ᐋᕿᑦᑎᐊᕋᓱᑲᓗᐊᖅᑎᓪᓗᒍ ᓄᓇᓖᑦ ᑮᓇᐅᔭᑎᒍᑦ ᐱᕚᓪᓕᕈᓐᓇᐅᑎᒃᓴᖏᓐᓄᑦ, ᒪᓕᒐᓕᕐᓗᒋᑦ ᑯᐊᐳᕇᓴᒃᑯᑦ ᐊᒻᒪᓗ ᓄᖃᖅᑎᓪᓗᒋᑦ ᓱᕈᖅᓴᖅᑕᖏᑦ ᐲᔭᖅᐸᓪᓕᐊᔭᒥᒃᑎᒍᑦ. ᓇᓕᖃᕇᓕᑦᑎᐊᑲᓐᓂᕐᓗᒍ ᐱᖁᔭᕐᓂᒃ ᓱᕋᐃᓐᖏᓂᖅ, ᑕᐃᒪᓗ ᑕᒪᒃᑯᐊ ᓄᓇᕐᔪᐊᑉ ᐊᑭᐊᓂᖔᖅᓯᒪᔪᑦ ᖃᓄᐃᓕᖓᓂᖓ ᐊᒻᒪᓗ ᓴᐳᒻᒥᑦᑎᐊᕐᓗᒋᑦ ᑕᒪᕐᒥᒃ ᓴᓇᔩᑦ.

ᓴᖕᖑᑎᓪᓗᒍ ᑮᓇᐅᔭᑎᒍᑦ ᐱᕙᓪᓕᐊᑎᑦᑎᓂᖅ ᓇᓕᖃᕇᑦᑎᐊᓕᖓᔪᒧᑦ ᓄᓇᕐᔪᐊᑉ ᐃᓱᓕᓂᕆᔭᖓ ᐅᓇᑦᑕᐅᖅ ᑐᑭᖃᖅᑐᖅ  ᐊᖕᖏᒡᓕᒋᐊᖅᖢᑎᒃ ᐱᓕᕆᕕᒋᔭᕗᑦ ᑮᓇᐅᔭᑎᒍᑦ ᐱᕙᓪᓕᐊᑎᑦᑎᓂᑦᑎᒍᑦ ᐅᑯᐊᓗ ᐊᑦᑎᒃᑑᔪᑦ ᐸᐅᖏᑦ: ᐸᕿᔭᐅᑦᑎᐊᕐᓗᓂ, ᐃᓕᓴᐃᓗᑎᒃ, ᐃᓄᓕᕆᓂᕐᒧᑦ, ᓴᓇᖑᐊᕐᓂᕐᒧᑦ ᐊᒻᒪᓗ ᐃᓄᓕᒫᑦ ᐱᔪᒪᔭᖏᓐᓂᒃ ᑐᓴᐅᓕᓂᕆᓂᕐᒧᑦ. ᐱᔭᕇᖅᑎᓪᓗᒍ ᑯᐸᐃᒃ ᓯᕗᓪᓕᐅᕈᑎᒋᓯᒪᔭᖓᑦ, ᑲᓇᑕᒥ ᐸᐃᕆᔪᓕᕆᓂᖅ ᐱᓕᕆᑎᑦᑎᔾᔪᑕᐅᔪᖅ ᐊᑑᑎᖃᓐᖏᑦᑐᑐᖄᓘᓕᖅᑐᖅ.   ᐅᓇ ᑕᒪᕐᒥᒃ ᓴᓇᔭᐅᓯᒪᔪᖅ, ᐊᑐᖁᔭᐅᔪᓂᑦ ᐊᕐᓇᓂᑦ, ᐅᓇ ᑲᑎᖓᑎᑦᑎᔪᑐᐊᖅ ᐋᕿᑦᑎᐊᕐᐸᓪᓕᐊᔪᓄᑦ ᐃᓅᓯᑦᑎᓂ, ᓂᓪᓕᖅᓯᒪᓕᕐᓗᑎᒃ ᓄᓇᓖᑦ – ᐊᒻᒪᓗ ᓴᖕᖏᒃᑎᓯᒪᔭᕆᐊᖃᕋᑦᑎᒍᑦ ᓄᓇᓖᑦ ᓵᑦᑎᓯᒪᓂᐊᕐᒪᑕ ᓇᓗᓇᖅᑑᖕᒪᑦ ᓯᕗᓂᒃᓴᕗᑦ ᐅᑯᐊᓗ ᑭᓯᐊᓂ ᐊᑐᕐᓗᒋᐅᔭᕆᐊᓕᑦ.

ᑕᐃᒪᓗ ᑕᒪᕐᒥᑦᑎᐊᐸᓗᒃ ᓴᓇᓂᖅ ᐸᕿᑦᑎᐊᕐᓂᐊᖅᑐᓂᒃ – ᓇᓕᐊᑐᐃᓐᓇᖅ ᐃᓄᖕᓄᑦ ᐅᒡᕙᓘᓐᓃᑦ ᓄᓇᕐᔪᐊᑦᑎᓄᑦ – ᒫᓐᓇᐅᔪᖅ ᐊᑭᓕᖅᓯᒪᓐᖏᑦᑐᑦ, ᑕᐃᒪᓗ ᐋᔩᖃᑎᒌᖃᑦᑕᖅᑐᑦ ᐱᓪᓗᒍ ᐱᒋᐊᕈᑖᑦ ᑮᓇᐅᔭᒃᓴᖅᑖᕆᔭᐅᖃᑦᑕᖅᑐᓂᒃ ᔪᓕᕘᓱ ᐊᕐᕌᒍᑕᒫ. ᐱᒋᐊᖅᑎᑕᐅᓯᒪᔪᖅ ᒫᓂᑑᐸ ᑕᐃᑲᓂ 1970-ᓂ, ᐅᓇ ᑮᓇᐅᔭᖃᕐᑎᑦᑎᕙᒃᑐᖅ ᔪᓕᕘᓱ ᐃᑲᔪᕐᓂᐊᖅᑐᖅ ᐊᔭᐅᖅᑕᐅᓗᐊᕐᓂᐊᓐᖏᒻᒪᑕ ᐃᖅᑲᓇᐃᔮᖃᕆᐊᖃᕐᓗᑎᒃ ᐅᑯᐊᓗ ᐅᓗᕆᐊᖅᓵᕆᔪᓄᑦ ᑭᑐᖓᕆᓂᐊᖅᑕᑦᑎᓄᑦ ᖃᐅᒃᐸᑦ ᐊᖃᒍ, ᐊᑏ ᓂᕆᑎᓪᓗᒋᑦ ᕿᑐᕐᖓᑎᑦ ᐅᑉᓗᒥ. 

ᐅᖃᖅᐳᒍᒃ ᐅᓇ “ᐊᔪᖅᓴᓗᐊᕐᑎᑦᑎᓂᖅ” – ᐅᓇᓗ ᐃᕐᖐᓐᓇᖅ ᐅᓇᑖᖃᓕᖃᑦᑕᖅᑐᑦ ᑲᒻᐸᓂᐅᔪ ᑕᒪᒃᑯᐊ ᓲᕐᓗ ᐃᓕᓐᓂᐊᕐᕕᑦ ᐊᒻᒪᓗ ᐋᓐᓂᐊᕕᑦ, ᑕᐃᒪᓗ ᐃᓄᓕᒫᑦ ᐃᖏᕐᕋᑲᑕᒡᕕᖃᕐᑎᔮᕐᓇᒋᑦ ᐊᒻᒪᓗ ᐆᒻᒪᖁᑎᓕᕆᓂᖅ ᐃᒻᒥᒎᖅᑐᓂᑦ ᐱᖁᑎᒋᔭᐅᓪᓗᑎᒃ – ᐅᓇ ᐃᓂᑐᖄᓗᖏᓐᓂᒃ ᑕᐃᒪᓐᓇᐃᓕᖓᐃᓐᓇᕐᑎᑦᑎᓂᖅ ᐃᓱᒪᓂᖓ ᐅᑯᐊᓗ ᐅᓗᕆᐊᓇᕈᓐᓇᖅᓯᔪᑦ ᐃᓅᓯᖓᓂ ᓄᓇᕐᔪᐊᖅ.  ᑮᓇᐅᔭᖅᑕᖃᖅᑐᖅ ᐊᑭᓕᕆᐊᖃᖅᑕᑦᑎᒍᑦ ᐅᓇ ᐊᖕᖏᔪᒥᒃ ᐊᓯᕈᖅᑎᑕᐅᔪᓐᓇᖅᑐᖅ – ᐱᖃᑐᐃᓐᓇᕐᓗᑕ ᐱᔪᓐᓇᐅᑎᒃᓴᑦᑎᓂᒃ ᐊᑐᐊᒐᕐᑎᒍᑦ ᐱᔭᐅᔪᓐᓇᖅᓯᑎᓪᓗᒍ. ᑕᐃᒪᒃᑕᐅᖅ ᐃᓱᓕᑎᓪᓗᒍ ᐅᓱᐊᓗᖃᕆᐊᖃᖅᑐᓂᒃ ᐆᒻᒪᖁᑎᖃᕐᓂᕐᒧᑦ ᐊᑭᒡᓕᒋᐊᕈᑏᑦ. ᑮᓇᐅᔭᓕᕆᔾᔪᑕᐅᔪᑦ ᑖᒃᓰᔭᕈᑕᐅᓪᓗᑎᒃ. ᐅᓄᖅᓯᕚᓪᓕᕐᓗᒋᑦ ᐃᑲᔫᑕᐅᔪᓄᑦ ᓂᖏᕈᑏᑦ. ᑮᓇᐅᔭᒃᓴᖏᑦ ᐊᑭᑦᑐᕆᐊᕐᓗᒋᑦ ᑯᐊᐳᕇᓴᒃᑯᑦ ᐊᒻᒪᓗ ᐊᔪᖅᓴᓐᖏᑦᑐᐋᓗᓕᖅᖢᑎᒃ ᐃᓄᐃᑦ. ᑖᒃᓰᔭᕐᑎᓪᓗᒋᑦ ᐸᐅᓕᕇᓐᓇᔭᑦᑐᑦ. ᓇᑲᓪᓗᒋᑦ ᐅᓇᑕᖅᑐᒃᓴᓄᑦ ᑮᓇᐅᔭᐃᔭᕈᑕᐅᔪᑦ.  ᑕᒪᕐᒥᒃ ᐅᑯᐊ ᒪᓕᒃᑐᑦ ᐱᔭᕐᓂᖅᑐᓂᒃ “ᓱᕈᖅᓴᐃᔪᖅ ᐊᑭᓖᓗᓂ” ᑐᖕᖓᔾᔪᑖᑦ ᐊᒻᒪᓗ ᓄᖃᖓᑎᓪᓗᒋᑦ ᐊᖏᔪᒻᒪᕆᐋᓗᖕᓂᒃ ᑕᐃᒪᓐᓇᐅᓂᐊᕐᓂᕋᐃᓯᒪᔪᑦ.

ᐊᑕᐅᓯᖅ ᑐᑭᓯᓇᑦᑎᐊᖅᑐᖅ: ᐃᓄᓕᒫᑦ ᐱᑕᖃᑦᑎᐊᓐᖏᑦᑐᓂᒃ ᓇᓗᓇᖅᑐᓂᒃ ᑮᓇᐅᔭᓕᐅᕈᑎᖃᕐᔪᐊᖃᑦᑕᖅᑐᑦ ᐅᑯᐊ ᓂᐅᕈᖅᑐᓕᕐᓂᕐᒧᑦ ᐅᓗᕆᐊᓇᕐᔪᐊᑰᖅᑎᑦᑎᔪᑦ, ᓴᓇᓯᒪᔪᖅ ᓱᕋᑦᑎᓗᒋᑦ ᐱᔪᒪᔭᕗᑦ ᐃᓅᓚᐅᓐᖏᓂᖏᓐᓂ ᓴᕿᓚᐅᓐᖏᓂᖏᓂ.

ᐅᑯᐊ ᐱᔪᒪᔭᕗᑦ ᐅᖓᑖᓃᑦᑐᑦ ᑎᑎᕋᖅᓯᒪᑐᐃᓐᓇᖅᑐᑦ. ᑲᑎᒪᑎᑦᑎᔪᒪᕗᒍᑦ ᓄᓇᓕᖕᓂᒃ ᓇᓂᑐᐃᓐᓇᖅ ᑲᓇᑕᒥ  ᑕᐃᒪᓂᓗ ᓄᓇᖃᖅᑐᑦ ᑲᑎᑦᑎᐊᕐᓗᑎᒃ ᐅᖃᐅᓯᒃᓴᒥᖕᓂ ᓇᓗᓇᐃᑦᑎᐊᕐᓗᑎᒃ ᑭᓱ ᐱᕚᓪᓕᐅᑕᐅᔪᓐᓇᖅᑐᑦ ᓯᕗᓂᑦᑎᓄᑦ ᑮᓇᐅᔭᖃᕈᑕᐅᓂᐊᖅᑐᑦ ᓇᖕᒥᓂᖅ ᓄᓇᒥᖕᓂ.

ᖃᓄᐃᑉᐸᓪᓕᐊᓂᐊᖅᑐᑦ, ᖃᑖᓂᑦ ᐱᒋᐊᖅᑐᑦ ᑎᑭᐅᑎᓯᒪᓂᐊᖅᑐᖅ ᓄᑖᕈᕆᐊᕐᓗᒍ ᒐᕙᒪᖃᕐᓂᖅ ᓂᕈᐊᖅᑕᐅᓯᒪᔪᓕᕆᓂᖅ ᑕᒪᐃᓐᓂ ᒐᕙᒪᒃᑯᓂ, ᓴᓇᖃᑎᒌᑦᑎᐊᕐᓗᑎᒃ ᐱᖓᓚᔪᓂᒃ ᐱᓕᕆᔾᔪᑕᐅᓂᐊᖅᑐᓂᒃ ᐅᑯᐊ  ᑕᒪᕐᒥᒃ ᓂᕈᐊᕈᑕᐅᔪᑦ ᐊᑑᑎᖃᖅᑐᑦ ᐊᒻᒪᓗ ᑯᖕᖓᔾᔪᑕᐅᔪᑦ ᑮᓇᐅᔭᖏᑦ ᐲᖅᑕᐅᓗᑎᒃ ᓂᕈᐊᖅᑕᐅᓇᓱᒃᑐᓄᑦ.

ᐅᓇ ᐊᖕᖏᔪᒻᓚᕆᐋᓗᒃ ᐱᓕᕆᔭᕆᐊᒃᓴᖓ, ᑭᓯᐊᓂᓕ ᐅᑉᓗᒥᐅᔪᖅ ᑕᐃᒪᓐᓇᐅᔭᕆᐊᖃᓕᕋᑦᑕ ᐃᓅᓯᕆᔭᑦᑎᓂ.

ᐊᑭᒡᖠᒋᐊᕐᓗᒋᑦ ᐅᖅᓱᐊᓗᖕᒧᑦ ᐊᑭᖏᑦ ᐊᒃᓱᕈᓗᐊᕐᑎᑦᑎᔪᓐᓃᕋᔭᖅᑐᖅ ᓱᕈᖅᓴᐃᔪᓂᒃ ᑕᐃᒪᓗ ᓄᑖᑦ ᐱᓕᕆᔾᔪᑕᐅᓕᖅᑐᑦ ᐊᔪᖏᑎᓐᓂᐊᕐᒪᒋᑦ. ᐅᓇ ᓄᖃᖓᓂᖓ ᐊᐅᓚᑦᑐᓐᓇᖏᑖᓗᕗᑦ ᐊᖕᖏᒡᓕᕙᓪᓕᐊᔪᖅ ᑕᐅᑐᒃᑕᐅᓐᖏᓪᓗᓂ ᐱᓂᖅᓘᑕᐅᓇᔭᕐᓂᖓᓂ, ᑭᓯᐊᓂᓕ ᑐᓐᓂᖁᓯᐊᕋᐃᓐᓄᑦ ᐅᓇ. ᐅᓇ ᑐᓂᓯᓯᒪᔪᖅ ᐅᕙᑦᑎᓂᒃ ᑕᑯᔪᓐᓇᖅᖢᒍ ᑭᓲᕈᖅᑎᓯᒪᔭᐅᓕᕐᓂᑦᑎᓂᒃ – ᐃᓱᒪᓕᐅᕆᓂᐊᕐᓗᑕ ᐊᓯᑦᔩᓂᐊᕐᓂᕐᒧᑦ.

ᐊᒻᒪᓗ ᓂᕈᐊᒐᒃᓴᖑᖂᕆᕙᒃᑐᒍᑦ ᐱᕕᖃᕐᑎᑦᑎᓗᑕ ᐊᒻᒪᓗ ᐊᑐᕐᓗᒍ ᑕᒪᓐᓇ ᑐᐊᕕᕐᓇᖅᑐᒥᒃ ᐱᔭᔪᒪᔪᑦ ᐊᓯᑦᔨᖅᐸᓪᓕᐊᓂᐊᕐᓂᕐᒧᑦ ᑭᓱᕈᕐᐸᓪᓕᐊᓂᐊᕐᓂᕐᒧᑦ. ᐅᓇ ᐱᔭᒃᓴᕆᔭᕗᑦ ᑕᐸᓇᓐᖏᑦᑐᖅ ᑕᒫᓂ ᓄᓇᑦᑎᓂ ᓱᕋᐃᓯᒪᔪᖅ ᑭᖑᓂᑦᑎᓂ, ᐅᑯᐊᓗ ᐊᒃᓱᕈᕐᔪᐊᕐᓂᐊᖅᑐᑦ ᒫᓐᓇᐅᔪᖅ, ᐊᒻᒪᓗ ᑕᒪᑦᑕ ᐱᔪᓐᓇᕐᓂᖃᖅᑐᒍᑦ ᖃᐅᒪᑦᑎᐊᖅᑐᒃ ᐊᒻᒪᓗ ᐅᓗᕆᐊᓇᖅᑐᖃᓐᖏᑦᑐᓂᒃ ᓯᕗᓂᒃᓴᖃᕐᓗᑕ.

ᒫᓐᓇ ᑕᐃᒻᒪ ᓈᒻᒪᒃᓯᔪᖅ ᖃᐅᔨᒪᓐᖏᑕᕋᓗᐊᑦᑎᒍᑦ ᐱᒋᐊᓕᕐᓗᑕ.

ᒫᓐᓇ ᓈᒻᒪᒃᓯᔪᖅ ᐱᕚᓪᓕᕆᐊᓕᕈᑦᑕ.

ᐅᓇ ᑎᑎᕋᖅᑕᖓ ᓂᕈᐊᖅᑕᐅᔪᒪᔪᓄ ᐱᕚᓪᓕᕈᑎᒃᓴᐅᔪᖅ ᐱᒋᐊᖅᑎᑕᐅᕗᖅ ᐅᐱᕐᖔᖓᓂᑦ 2015 ᑲᑎᒪᓪᓗᑎᒃ ᑐᓛᓐᑐ ᑲᑎᒪᓚᐅᖅᑐᑦ ᑭᒡᒐᖅᑐᖅᑎᑦ ᑲᓇᑕᒥ ᓄᓇᖅᑲᖅᑳᖅᓯᒪᔪᓄᑦ ᐱᔪᓐᓇᐅᑎᖃᖅᑐᓄᑦ, ᐃᓅᓯᓕᕆᓂᕐᒧᑦ ᐊᒻᒪᓗ ᓂᕿᑦᑎᐊᕆᒋᐊᖃᕐᓂᕐᒧᑦ, ᐊᕙᑎᓕᕆᓂᕐᒧᑦ, ᐃᒃᐱᒐᓱᑦᑎᐊᕐᓂᕐᒧᑦ ᐱᓯᒪᔪᑦ ᐊᒻᒪᓗ ᐃᖅᑲᓇᐃᔭᖅᑐᓕᕆᓂᕐᒥ ᐱᕚᓪᓕᖅᑎᑕᐅᓇᓱᒃᑐᓄᑦ.